Showing posts with label ဒေသဆိုင်ရာ. Show all posts
Showing posts with label ဒေသဆိုင်ရာ. Show all posts

ဇင်ယော်မျက်ရည်ဝေ့သီသီ

Saturday, September 26, 2009

20 comments
ပုံကို (Google) ထဲတွင် ရှာဖွေထားပါသည်။


တလိမ့်လိမ့်ယိမ်းခါကခုန်နေကြသည့် လှိုင်းတွေပေါ် လျှပ်တိုက်ပျံသန်းရင်း ပျော်ပါးသီကြွေးနေကြတဲ့ ဇင်ယော်ငှက်တို့ ၏ တေးသံသည်ကပင် ကျုပ်အတွက် အပန်းဖြေစရာပင်မဟုတ်ပါလော။ ကျုပ်ကိုယ်တိုင် စိတ်တိုင်းကျ တည်ဆောက်ထားတဲ့ ဇင်ယော်လို့ အမည်ခံ လှေသမ္ဗာန်ငယ်လေးနှင့် ဒီမြစ်ပြင်ကျယ် ခရီးလမ်းကို နေဝင်မှနေထွက် ကျင်လည်ခဲ့တာ ဘဝရဲ့သက်တမ်းသုံးပုံတစ်ပုံလောက်ပင် ရှိနေပြီ။ ဟိုဘက်ကမ်းကနေ ဒီဘက်ကမ်း စုန်ဆန်ကူးရင်း ကူးတို့ ခတ်သမားအဖြစ်နှင့်တစ်မျိုး ၊ ငါးဖမ်းသမားအဖြစ်နှင့်တစ်ဖုံ ဒီမြစ်ရေပြင်ကျယ်ပေါ်မှာ ဘဝအစုံစုံကျင်လည်ခဲ့တာ ကျုပ်အတွက် ပင်ပန်းလွန်းပေမဲ့ စိတ်ချမ်းမြေ့ စရာတွေပါ။

ညတွေမှာ သုခိတာဆေးပေ့ါလိပ် ရှိုက်လို့ ကဗျာဆန်ဆန် ကြယ်ကလေးတွေကို ရေတွက်နေတတ်တယ်ဆိုရင် ဘဝသမား ကျုပ်ကို ခင်ဗျားတို့  ရယ်ကြမလားပဲ။ နီယွန်မီးအလင်းရောင်ထက် မှောင်မှောင်မည်းမည်းနှင့် လမိုက်ညလိုဟာမျိုး၊ လရောင်ဆမ်းတဲ့ ရေပြင်ထက်က လရိပ်ထင်တဲ့ညတွေမျိုးကို သဘာဝထဲစီးမျောရင်း ကျုပ်က အပြည့်အဝခံစားပြစ်လိုက်တာ။ အဲဒီလို သဘာဝရဲ့လက်ဆောင်တွေ ဘယ်လောက်ငြိမ်းချမ်းလဲဆိုတာ လူတော်တော်များများက သိချင်မှ သိမှာပါ။

နေတတ်ရင် ဘဝဟာ ကျေနပ်စရာပါ ဆိုတဲ့စကားက ကျုပ်အတွက် မှန်ကန်လွန်းနေပြန်တယ်လေ။ ကြည့်ပါအုံး ကျုပ်မှာ ပိုင်တာဆိုလို့  ဒီလှေသမ္ဗာန်တစ်စီးပဲရှိတယ်။ အသိုက်အမြုံ အိမ်ဆိုတာ ကျုပ်အတွက် တွေးမျှော်မှန်းစရာ အိပ်မက်ပမာ ရှိနေတုန်းပဲ။ ဘာပဲဖြစ်ဖြစ် ဒီလှေသမ္ဗာန်ပေါ်မှာပဲ ကျောတစ်နေရာစာ ချရဖို့ ၊ မနက်ဖြန်တွေမှာ သမုဒ္ဒရာဝမ်းတစ်ထွာဖြည့်ဆည်းဖို့  ဆိုတာတွေက သိပ်အခက်အခဲကြီးမဟုတ်တော့ ပူပန်တတ်တဲ့စိတ်ဆိုတာ ကျုပ်နဲ့ မဆိုင်သလိုပါပဲ။ အဲဒါကြောင့် ပြောတာပေါ့ ကျုပ်က ဘဝမှာ ပျော်ရွင်နေတဲ့ လူသားတစ်ယောက်ဆိုတာကိုလေ။

ကျုပ်ရဲ့ အခြားတစ်ဖက်မှာ ရပ်တည်ရှင်သန်နေကြတဲ့ ကူးတို့ စီးနင်းလိုက်ပါကြသူတစ်ချို့ ရဲ့ မျက်နှာကို အခုတလော ကျုပ်သေသေချာချာ သတိထားမိကြည့်တယ်။ ပင်ပန်းဖျော့တော့နေတဲ့မျက်ဝန်းတွေ ၊ ကြောက်ရွံထိန့် လန့် နေကြတဲ့ နှုတ်ခမ်းတွေ ၊ သောကဖိစီးလို့  ချောင်ကျနေတဲ့ ပါးပြင်ချိုင့်ချိုင့်တွေကို ကျုပ် နားမလည်စွာနှင့် ငေးမောအဖြေရှာနေမိတယ်။ သူတို တွေ ဘာကြောင့်ဒီလို သောကဝန်တွေ ပိနေရလဲဆိုတာ အကြောင်းစုံမသိခင်တုန်းက သာမာန်ကာလျှံကာပဲ ကျုပ် သဘောထားမိခဲ့တယ်။

ရိက္ခာတွေ ပြတ်တဲ့တစ်နေ့ ကုန်းပေါ် ရောက်မှပဲ ကျုပ်အကြောင်းစုံသိခဲ့ရတယ်။ ကျုပ်တို့ နယ်ဘက်ရဲ့ ရွှေဖြူ တောကြီး(ရာဘာခြံ)တွေ အလဲလဲ၊အပြိုပြို နဲ့  မြင်မကောင်းအောင် ခုတ်ထစ်ခံနေရတယ်။ ကျုပ်တို့ နယ်ဘက်က လူတွေအားလုံးရဲ့ အသက်သွေးကြောဆွဲနှုတ် လှန်ပစ်ခံနေရတာ ရင်မဆံ့အောင် မြင်ခဲ့ရတယ်။ ဒီခြံလုပ်ငန်းကိုပဲ မှီခိုပြီး နေသားကျနေပြီဖြစ်တဲ့ ကျုပ်တို့ နယ်သားတွေရဲ့ ဘဝ ယိမ်းယိုင်ရတော့မဲ့အရေး ကျုပ်လို ဘာမှမရှိ လှေသဗ္ဗာန်တစ်စီးနဲ့ ရောင့်ရဲနေထိုင်တတ်တဲ့လူတောင်မှ စိတ်မခိုင်နိုင်တော့ပါဘူးဗျာ။

နောက်ပြီး မြို့ တော်ကြီးမှာ တက္ကသိုလ်ပညာ သင်ကြားခြင်းပြုနေကြတဲ့ ခြံစိုက်သူတွေရဲ့ သားသမီးတွေဟာလည်း ကမန်းကတန်း ရွာကို အပြေးပြန်လို့  သူတို့ နောင်ရေး ဆက်ရန်ရှိ၊မရှိ ရင်တထိတ်ထိတ်နှင့်မျက်နှာတွေကို ကြည့်ရင်း ကျုပ်စိတ်မကောင်းဖြစ်မိတယ်ဗျာ။ တကယ်ဆို လတ်ဆတ်ပျိုမြစ်နေရမဲ့  အရွယ်တွေပါ။ သူတို့ လေးတွေကို ညှိုးနွမ်းခြောက်သွေ့ သွားအောင် လုပ်သွားတဲ့ တရားခံက မသိကျိုးကျွန်ပြုနေနိုင်တာကိုကျတော့ ရက်စက်တယ်လို့ ဆိုရမလား။ ယုတ်မာတယ်လို့ ဆိုရမလားပဲ။ ကျောက်ခဲလိုမျိုး နေတတ်တဲ့ ဘဝသမား ကျုပ်ကိုယ်တိုင်တောင်မှ မျက်ရည်စို့ နေပြီဗျာ။

လှိုင်းကြားထဲမှာ ပျော်နေတတ်တဲ့ ဇင်ယော်ငှက်တစ်ကောင်လို ကျုပ်လည်း ဘယ်တော့များ မြစ်ရေပြင်အောက် လျှိုလို့  အသက်မွန်းရမဲ့နေ့ ရက်ရောက်လာအုံးမလဲမသိဘူး။ အဲဒီအခါကျရင် သဘာဝအလှအပရဲ့ အဝေး၊ ရိုးသားဖြူစင်တဲ့ အပြုံးတွေနဲ့  ကျောခိုင်းမဲ့ပင်လယ်ပျော်ဇင်ယော်တစ်ကောင် အနေနှင့် ကျုပ်လည်း အခြားပင်လယ်အတုတစ်ခုမှာ မျက်ရည် တဝဲလည်လည်နှင့် ခဏတာ မှီခိုဖြစ်မိအုံးမယ်ထင်ပါတယ်။

အဏ္ဏဝါထက် ဖြန့် ကျက်မိသော အတွေးကွန်ယက်များ

Thursday, July 30, 2009

13 comments

ကောင်းကင်ထက်မှ ခရမ်းရင့်ရောင်ပုတ်ပုတ် မိုးသားအလိပ်လိပ်တို့ သည် မြေပြင်တခွင်ပေါ် မှိုင်းမှိုင်းညှိ့ ညှိ့ နှင့် ဖြန့် ကျက် ခင်းထားသည်။ မကြာခင် သည်းသည်းမည်းမည်း ရွာချတော့မည့်ဟန် ဆောင်နေတဲ့ မိုးသားတွေနှင့် အပြိုင် မော်လမြိုင်(ဈေးကြီးဆိပ်ကမ်း)မှ သမိန်းဗရမ်း နှစ်ထပ်သင်္ဘောသည်လည်း ဒေါမာန်ပြင်းသည့် လှိုင်းကြမ်းထက်ကို ဖြတ်ပြီး ဘီလူးကျွန်းဆီသို့  ခုတ်မောင်းရန် တာစူလျက်ရှိပေသည်။


မိုးမလာခင် ကုန်တင်ကုန်ချ အလုပ်သမားများသည် ကုန်ပစ္စည်းများကို ထမ်းပြီး သဘောင်္ပေါ်သို့  တသုတ်သုတ်နှင့် တိုးဝှေ့ တင်ဆောင် နေကြသည်။ အခေါက် အရေအတွက်များများ ရမှ လုပ်အားခ ပိုထွက်မည် ဖြစ်သလို မိုးတွေ စိုကုန်မှာစိုးလို့ အလျင်အမြန် ပြေးလွှားမိကြတော့ ခရီးသည်အချို့ နှင့် ထိမိခိုက်မိပြန်သည်။ နားလည် ကိုယ်ချင်းစာတတ်တဲ့သူများက ဘေးဝဲယာ ကပ်ပေးကြသလိုပဲ တစ်ချို့ တွေကြတော့ ချွေးတွေပြန် ညစ်ပတ်ပေကျံ နေကြသော အလုပ်သမားတွေကို နှာခေါင်းရှုံ့ ပြီး ဘေးယာ ကပ်ကြသည်လည်း ရှိသည်။


သင်္ဘောထွက်ရန် နာရီဝက် လိုသေးသဖြင့် ကျွန်တော်လည်း ဘောတံတား ဘေးကနေ အေးအေးလူလူပင် ဆင်းလာခဲ့သည်။ သင်္ဘောအဝင် ဘေးယာတွင် ယာယီ ထီးကလေးတွေနှင့် စာကလေးခွေ ၊ ပဲပြားအစာသိပ် စသည့် မုန့် ပဲ သရေစာများစွာကို ရောင်းချနေကြတဲ့ ဈေးသည်များ ပြည့်ကျပ် နေသဖြင့် သင်္ဘောပေါ်သို့  တော်တော်နှင့် မလှမ်းနိုင်။ မိုးကလည်း သည်းစပြု နေပြီးဆိုတော့ သင်္ဘောပေါ်သို့  ရောက်ရန် စိတ်လောနေသော ခရီးသည်တစ်ချို့ မှ စည်းကမ်း မရှိသော ဈေးသည်များကို အပြစ်တင် ဝေဖန်သံကို လည်း ကြားရပြန်သည်။ လူအမျိုးမျိုး စိတ်အထွေထွေ ဆိုတော့ ဒီမြင်ကွင်းမျိုးက မဆန်းပါပေ။


သင်္ဘောပေါ်ရောက်တော့ လက်မှတ်ရောင်းသည့် ကောင်တာမှာ ရောင်းမည့်သူ ပျောက်နေသည်။ ကိစ္စမရှိ ။ လက်မှတ်လာ ကောက်ရင် ပိုက်ဆံပေးလိုက်လို့ ရသည်။ လက်မှတ် လာကောက်သည့် ချာတိတ်တွေကလည်း ထိုပိုက်ဆံကို တရိုတသေနှင့် ခါးကြားထဲ လိမ်ထိုးထည့်လိုက်မည်။ ထိုသို့  အားပေးမှုကြောင့် တစ်ခါတစ်လေ လက်မှတ်စစ်နဲ့ တိုးပြီး လက်မှတ်ဖိုးနှစ်ဆ ပေးဆောင်ခဲ့ရဖူးသည်။


သင်္ဘော ကျောက်ချထားသည့် ဆိပ်ကမ်းနားတွင် ရာသီပေါ် သစ်သီးနှင့် ဟင်းသီးဟင်းရွက် ပို့ သည့် လှေငယ်ငယ် များလည်း အစီအရီ အမြောက်အများ။ စိမ်းစားဥ ၊ ဖရဲသီး ၊ ကြက်မောက် ၊ မင်းဂွတ် ၊ ကျွဲကော် နှင့် ဒူးရင်း စသည့် အသီးအနှံများကို တင်ဆောင်လာကြသည်။ လာယူသည့် ဖောက်သည်များဆီ ပို့ ဆောင် ပေးပြီးကြတဲ့ လှေငယ်များသည် ဆိပ်ကမ်းမှ အလျှိုလျှို ခွာနေကြပြီး ဒီမိုးသည်းသည်း လေကြမ်းကြမ်း လှိုင်းလုံးကြီးကြီးပေါ်တွင် အန်တုရင်ဆိုင်ဖို့  စတင်ထွက်ခွာ တိုးဝင်နေပြန်သည်။ သမုဒ္ဒရာ ဝမ်းတစ်ထွာအတွက် ပင်လယ်ပြင်မှာ ပျော်ပါးရင်း အသက်ကိုပင် လောင်းကြေးထပ်ဝံ့သူများပင်ပေလော။


တူ……………..တူ


ဥသြဆွဲသံ ကြားမှ လှေငယ်တွေထံ အကြည့်အတွေးကို ရုပ်သိမ်းပြီး လက်ရှိအချိန်ကို ပြန်ရောက်လာသည်။ တစ်လှေ (သင်္ဘော) ထဲစီး တစ်ခရီးထဲသွား မည့်သူများကို ကြည့်လိုက်တော့ တစ်နေကုန်လှုပ်ရှား ဈေးဝယ် ဈေးရောင်း ခဲ့ကြတဲ့ သူတွေများသည် မောမောပန်းပန်းနှင့် အနားယူ အိပ်စက်နေကြသည်။ တစ်ချို့ သော မိန်းမကြီးတွေကတော့ လူစုံတုန်း ဝိုင်းဖွဲ့ ဆိုသလို ရပ်ရေးရွာရေးကို နဖူးတိုက်ဒူးတိုက် တိုင်ပင်ဆွေးနွေး နေကြသလိုလိုပင်။ ဟိုတစ်ဖွဲ့  ဒီတစ်ဖွဲ့ ။


ကျွန်တော်သည်လည်း မဝေးလှတဲ့ခရီးကို တစ်နာရီကျော် စီးရသည့် တုံ့ ဆိုင်းဆိုင်း သင်္ဘောပေါ်တွင် ဘောလုံးဂျာနယ် တစ်စောင်ကို ဖတ်ရင်း အချိန်ဖြုန်းနေမိသည်။ တစ်ခါတစ်ခါ ခပ်ပြင်းပြင်းရိုက်ခတ်လာတဲ့ လေကြမ်းကြမ်းတွေကြောင့် သင်္ဘောကြီး ဘယ်ညာလူးလျက်ရှိနေပြန်သည်။ တစ်ခါတစ်ခါကျတော့ လေမိုးငြိမ်လို့  လှိုင်းလေးတွေ ငြိမ့်ငြိမ့်လေးသယ်ဆောင်ပြန်သွားသည်။


အဏ္ဏဝါထက်တွင် သင်္ဘောတစ်စင်းပေါ် စီးနင်းလိုက်ပါ လာတဲ့သူနှင့် လှေငယ်လေး တစ်စင်း လှော်ခတ် သွားကြတဲ့သူများ၏ စိန်ခေါ်သံများ ကွာခြားပေလိမ့်မည်ဟု တွေးမိပြန်သည်။ လက်တွေ့ ဘဝ ပင်လယ်ပြင်မှာလည်း ကျွန်ုပ်တို့ က ကံကြမ္မာ မျက်နှာသာပေးမှုကြောင့် လုံခြုံမှုအနည်းငယ်ရှိသည့် သဘောင်္စီးခွင့်ကြုံခဲ့ရပြီးဖြစ်သည်။ တစ်ခါတစ်ရံ လှိုင်းလေကြမ်းချင် ကြမ်းပါမည်။ သင်္ဘော ဘယ်ညာလူးချင် လူးပါမည်။ ကျွန်ပ်တို့ ဘဝ ခဏတာ ယိမ်းယိုင်ချင်လည်း ယိမ်းယိုင်မိပါလိမ့်မည်။ ဒါပေမဲ့ အကြာကြီးတော့ တွေဝေငေးငိုင်ဆွေးမြေ့ နေစရာမလိုဘူးထင်ပါသည်။ ဘာကြောင့်လဲဆိုတော့ လှေငယ်ကလေးနှင့် အဏ္ဏဝါပြင်မှာ အသက်ကိုလောင်းကြေးထပ်ပြီး လှော်ခတ်နေကြတဲ့ လှေငယ်များရဲ့ ပဲ့ကိုင်ရှင်၏ မာန် ကို မြင်မိတွေ့ မိ အားကျမိသွားသောကြောင့်ပင်။


သင်္ဘောကတော့ ပုံမှန်အတိုင်း အင်ဂျင်စက်သံတညံညံနှင့် လိုရာခရီးခုတ်မောင်းလျက်ရှိနေသည်။ လှိုင်းတွေကလည်း သင်္ဘောကိုယ်ထည်ကို ဒေါသတကြီး တစ်ခါတစ်ရံ ဝင်ဆောင့်လျက်။ အတွေးများနှင့် ကျွန်တော်လည်း လေအဝှေ့ မှာ လာစင်သည့် မိုးရေစက်များကြောင့် ………..

မိညိုသို့ (ဝါဆို လွမ်းချင်း)

Wednesday, July 1, 2009

17 comments
ရပ်ရှစ်မျက်နှာပတ်လီ အုံ့ မှိုင်းမှိုင်းဖြစ်နေတတ်တဲ့ ဒီဝါဆိုခါသမယ... တစ်ချိန်တုန်းက ကြာပန်းကြာစွယ်ကို ချိုးပြီး လည်မှာ ဆွဲလို ပျော်နေတတ်တဲ့ မိညို..... ပျိုးထောင်ပျိုးကြဲ ထားကြပြီးလို့  စိမ်းစိမ်းလန်းလန်း ဖြစ်နေပြီး ဖြစ်တဲ့ လယ်ကွင်းပြင်ကြီးနားက လယ်တဲနဘေးမှာ ရွံ့ နှင့် လုပ်ထားတဲ့ အိုးပုတ်ကလေးတွေနှင့် ကစား နေတတ်တဲ့ မိညို… တစ်ခါတစ်လေ အမူအရာအပြည့်နှင့် တကြော်ကြော် အော်ဆိုကခုန်နေတတ်တဲ့ မိညို…သူမ ခဏခဏဆိုလို့  ကျွန်တော်တောင် လိုက်ဆိုမိတဲ့ ဆရာကြီး မင်းသုဝဏ်ရေးခဲ့တဲ့ ကလေးကဗျာ အပိုင်းအစ

“မိုးရေ တက်ရေ
တဖွေးဖွေး
ကွင်းကျယ်အဝေးဝေး။
လယ်စောင့်တဲလေး ခြေတံရှည်
မိုးကုပ်အောက်မှာတည်
ကြာနီတစ်ပွင့်ဖြူတစ်ပွင့်
တဲနဲ့ ပနံတင့်။
”

နောက်ပြီး ရှိပါသေးတယ် မိညို… “ဝါဆိုဝါခေါင် ရေဖောင်ဖောင်” ဆိုတဲ့အတိုင်း မိုးတွေကြီးလို့  ကျောင်းသွားတဲ့ ကတ္တရာလမ်းမကြီးပေါ်မှာ ရေတွေလျှံတက်တဲ့အခါမှာဆို စက်ဘီးတွေတွန်းပြီး ရေထဲလျှောက်ရတာ ပျော်နေတတ်သေးတယ်မဟုတ်လား…မိုးကြမ်းကြမ်းတွေ ခြွေလို့  အပင်အောက်မှာ မြေခ နေရတဲ့ ခရေပွင့် လေးတွေ ကိုလည်း ဆရာမ အတွက်ဆိုပြီး ငါ့ကိုပါ ဝိုင်းကူ ကောက်ခိုင်း တတ်သေးတယ်။ နင်တို့ အိမ်မှာ ကြာရိုးကြာစွယ် နှင့် ပုစွန်ဟင်း ပူပူစပ်စပ်လေးချက်တဲ့နေ့ တွေဆိုရင် မိုးချမ်းချမ်းမှာ ချွေးပြန်အောင် ဝင်စား ခဲ့တာတွေလည်း ဘယ်မေ့လို့  ရမလဲဟာ။

လရာသီတွေ တစ်လှည့်ပြီး တစ်လှည့် ခစားဝင်ရောက်သလို ငါတို့ တွေလည်း တစ်နှစ်ပြီး တစ်နှစ် အသက်တွေ ကြီးလာခဲ့ပေမဲ့ ဒီလဝါဆို ရောက်ရင် နင်ရောငါရော ရွာကိုအလည်ပြန်ကြမြဲ။

ငါတို့ ရွာက ချောင်းနှင့် ဝေးတော့ တောင်ပေါ်ဘုရား အနီးအနားမှာ အလေ့ကျပွင့်နေတဲ့ ပန်းတွေကို ခူးပြီး ဘုရားမှာ ကပ်လို့  ဝါဆိုပန်းခူး အလေ့ကို နွှဲကြတယ်နော်။ ဆယ်တန်းအောင်ကာစ ငါတို့  ပထမဆုံး အတူတူ ဝါဆိုပန်းခူးထွက်တုန်းက သူငယ်ချင်းတွေစကြလို့  ရှက်သွေးဖြာနေတဲ့ နင့် မျက်နှာ နီနီလေးကိုကြည့်ပြီး ငါ လူပျိုစိတ် စဝင်ခဲ့ဖူးတယ် မိညို…

ဒီလရာသီမှာ ဘုန်းကြီးတွေ ကျောင်းမှာပဲ ဝါကပ်တဲ့ ကာလမို့ လို့  ဥပုသ်နေ့ တိုင်း ရွာထိပ် ဘုန်းကြီးကျောင်းမှာ တရားပွဲ အမြဲရှိတယ်။ တစ်ခါက ဘုန်းကြီးကျောင်းကနေ ငါတို့ အဘိုးကို လိုက်ပို့ ပြီး အပြန်မှာ နင်က နင့်အဘွား နှင့်အတူ ဆွမ်းချိုင့်လေး ဆွဲပြီး တရားနာသွားတော့ “သူတော်စင်မလေး” ဆိုပြီး ဆိုင်ကယ် ပေါ်ကနေ ငါ လှမ်းစတော့ “ငရဲကြီးမယ်နော် မစနဲ့ ” ဆိုပြီး လူကြီး ဂိုက်နဲ့  နင့်ပုံစံလေး ကလည်း အေးချမ်းလှတယ် မိညို…

“သံဃာတော်များ စိမ်းစိုတဲ့ မြက်ခင်းနှင့် ပိုးမွှား အစရှိတဲ့ သတ္တဝါတွေကို နင်းခြေမိမှာ ကြောက်လို့  မိုးတွင်း ကာလမှာ ဒေသစာရီ ကြွချီရင် ပါစိတ် အာပတ်သင့်၏ လို့ မြတ်စွာဘုရားက ဆုံးမ ခဲ့တာကို အကြောင်းပြုပြီး ဝါတွင်း သုံးလပတ်လုံး သံဃာတော်များ ကျောင်းဂန်မှာပဲ ဝါကပ်ပြီး ခရီးသွားခြင်းကို ရှောင်ကျဉ်ခဲ့တာ ယနေ့့ အထိပဲ” ဟု စာသံပေသံနှင့် ငါ့ကို တရားအသိတွေ ပြောပြတိုင်း ပြုံးချင်ချင်ဖြစ်နေတတ်တဲ့ ငါ့မျက်နှာကို တွေ့ ပြီး စိတ်ဆိုးသွားတတ်သေးတယ်။ ငါက လှောင်တာမဟုတ်ဘူး သဘောကျလို့  ပြုံးသွားတာကို နားလည်ပါလေ မိညို…

ငါအလုပ်လုပ်တဲ့နေရာကနေ ပြတင်းပေါက်ကိုကျော်ပြီး လှမ်းကြည့်တော့ အခု မိုးတွေတဖွဲဖွဲရွာနေတယ် မိညို.. မိုးတွေ ရွာမှာပေါ့ ဝါတွင်း ရောက်ပြန်ပြီးလေဟာ။ အရင်တုန်းကလို နင့်ကို ကြာပန်းကြာစွယ် လည်ဆွဲလေးနှင့် မျက်စိထဲ ပြန်မြင်ယောင်မိတော့ မျက်နှာနုနုလေးကို လွမ်းမိသားဟာ။ ဝါဆိုပန်းခူးမှာ နင်တစ်ယောက်ထဲနှင့် ဝါးခြင်းထဲမှာ ခူးထားတဲ့ပန်းတွေ နည်းလို့  အားငယ်နေရော့မလား။ အဲဒီအခါကျရင် ပန်းအလုအယက် အတူတူ ခူးပေးဖူးတဲ့ ငါ့ကို သတိရပေးပါနော်။ ဘုန်းကြီးကျောင်းကနေ တရားနာပြီးလို့  ပြန်လာတိုင်း တစ်ဆင့်နားထောင်ပေးမဲ့သူ မရှိတဲ့ အခါမှာ “သူတော်စင်မလေး” လို့  စနောက်တတ်တဲ့ ပုရိသ တစ်ယောက် ကိုရော ဝါဆိုးမိုးနှင့်အတူ သတိရနေမှာလား။

မိုးတွေရွာလို့  မြန်မာပြည်အလွမ်းအနေနှင့် စိတ်ကူးယဉ်ရေးဖွဲ့ ထားခြင်းဖြစ်ပါတယ်။ ဒီနေရာအထိ ဖတ်ပေးတဲ့ စာဖတ်သူကို ကျေးဇူးတင်ပါတယ်...

 

Posts Comments

©2006-2010 ·TNB